முஸ்லிம் குடும்பத்தைச் சேர்ந்த ஃபர்ஹானா, தனது தந்தை அஜீஸ் (கிட்டி), கணவர் கரீம் (ஜித்தன் ரமேஷ்), மற்றும் குழந்தைகளுடன் எளிமையான வாழ்க்கை வாழ்ந்து வருகிறார். குடும்ப வருமானம் போதாததால், வேலைக்குச் செல்ல வேண்டிய நிர்ப்பந்தம் அவருக்கு. கால் சென்டர் ஒன்றில் சேர்கிறார். அதே நிறுவனத்தில் மற்றொரு பிரிவில் அதிக ‘இன்சன்டிவ்’ கொடுக்கிறார்கள். தோழிகள், ‘உனக்கு அந்த வேலை சரிபட்டு வராது’ என்று மறுத்தும், பணத்துக்காக அந்த டீமில் இணைகிறார் ஃபர்ஹானா. அந்த வேலை அவருக்கு அதிர்ச்சியை கொடுக்க, ஒரு சிக்கலையும் சிரமமின்றி கொண்டு வந்து நிறுத்துகிறது. அதில் இருந்து அவர் எப்படி மீள்கிறார் என்பது கதை.
திருவல்லிக்கேணி பகுதியில் வசிக்கும் நடுத்தர முஸ்லிம் குடும்ப வாழ்க்கையையும் பொருளாதாரத் தேவையை எதிர்கொள்ளும் ஓர் இளம் பெண்ணின் மனநிலையையும் இயல்பாகக் காட்டியிருக்கிறார், இயக்குநர் நெல்சன் வெங்கடேசன். பெண்களுக்கான பொருளாதார விடுதலையைப் பேசும் அவர், வேறு பெயர்களில் முகமறியா நபர்களுடன் நடக்கும் ‘ஃபிரண்ட்ஷிப் சாட்’களின் மூலம் வரும் ஆபத்துகளையும் எதார்த்தமாகக் காட்சிப்படுத்தி எச்சரித்திருக்கிறார் அழகாக.
from இந்து தமிழ் திசை : News in Tamil, Latest Tamil News India & World, Cinema, Hindu Tamil Thisai Daily Newspaper Online: தமிழால் இணைவோம்