கோவை சேரன் மாநகர் பகுதியில் சேறு மற்றும் மண் பல அடி உயரத்திற்கு தூக்கி வீசப்பட்ட சம்பவம் மக்கள் பீதி அடைய வேண்டாம் என (இந்தியன் ஆயில் கார்ப்பரேஷன்) விளக்கமளித்துள்ளது.
கோவை சேரன் மாநகர் பகுதியில் தண்ணீர் பந்தல் சாலையில் நேற்று சாலையோரம் அமைக்கப்பட்டிருந்த குழாய் இணைப்பு திடீரென கொப்பளித்து சேறும் சகதியுமாக பல அடி உயரத்திற்கு தூக்கி வீசப்பட்டது. இது அப்பகுதியில் பெரும் பரபரப்பை ஏற்படுத்தி இருந்த நிலையில், வட்டாட்சியர், மாவட்ட ஆட்சியர், மாநகராட்சி ஆணையர் உள்ளிட்டோர் நேரில் சென்று ஆய்வு மேற்கொண்டனர்.
இந்த நிலையில் குழாய் பதிப்பு பணியை மேற்கொண்டு வந்த இந்தியன் ஆயில் கார்ப்பரேஷன் நிறுவனம் சம்பவத்திற்கு விளக்கமளித்துள்ளது. வீடுகளுக்கு இயற்கை எரிவாயு அனுப்ப ஏற்படுத்தப்பட்டு வந்த குழாய் கட்டமைப்பில் காற்று மற்றும் நீரைச் செலுத்தி மேற்கொள்ளப்பட்ட ஆய்வுதான் இது. மக்கள் யாரும் அச்சப்பட வேண்டாம் என பதில் அளித்துள்ளது. இதுகுறித்து இந்தியன் ஆயில் கார்ப்பரேஷன் நிறுவனம் அளித்துள்ள விளக்கத்தில்....:
'இந்தியன் ஆயில் கார்பரேஷன் கோயம்புத்தூர் புவியியல் பகுதியில் நகர எரிவாயு விநியோக வலையமைப்பை உருவாக்குவதற்கும் இயக்குவதற்கும் அங்கீகரிக்கப்பட்ட நிறுவனமாகும். இன்றைய தேதியில் மதுக்கரை தாலுகா பிச்சனூர் கிராமத்தில் சிட்டி கேட் ஸ்டேஷன் தொடங்கப்பட்டு, கோயம்புத்தூரில் உள்ள 12 சில்லறை விற்பனை நிலையங்களில் வாகனங்களுக்கான சிஎன்ஜி விற்பனையை நடத்தி வருகிறது.
கோயம்புத்தூர் மாவட்டத்தில் 25 புதிய சிஎன்ஜி நிலையங்களை இயக்குவதற்கும், கோயம்புத்தூர் மாவட்டத்தின் நகர்ப்புற மற்றும் கிராமப்புறப் பகுதிகளுக்கு நுகர்வோரின் தேவையின் அடிப்படையில் திட்டத்தின் பொருளாதார வாழ்வின் போது வீடுகளுக்கு குழாய் மூலம் இயற்கை எரிவாயு (பிஎன்ஜி) இணைப்புகளை வழங்குவதற்கும் ஐஓசி நிகழ்ச்சி நிரலைக் கொண்டுள்ளது.
இந்தியன் ஆயில் நிறுவனம், பொதுமக்களுக்கு மலிவு விலையில் இயற்கை எரிவாயுவை வழங்க இரும்பு குழாய் மற்றும் பாலிஎதிலீன் குழாய் வலையமைப்பை உருவாக்கி வருகிறது. கோயம்புத்தூர் மாநகரில் எரிவாயு குழாய் பதிக்கும் பணிகள் கட்டுமான நிலையில் உள்ளது. கோயம்புத்தூர் நகருக்குள் எரிவாயு குழாய் பதிக்கப்பட உள்ளதாகவும் தெரிவிக்கப்பட்டுள்ளது.
எரிவாயு குழாய்கள் தேசிய மற்றும் சர்வதேச தரத்திற்கு ஏற்ப அமைக்கப்பட்டு சோதனை செய்யப்படுகின்றன. 11.08.2022 அன்று தண்ணீர்பந்தல் சாலையில் நடந்த இந்த சம்பவம், குழாயில் இருந்து மேம்படுத்தப்பட்ட சேறு மற்றும் அசுத்தங்களை அகற்றுவதன் ஒரு பகுதியாகும், மேலும் காற்று மற்றும் நீர் மட்டுமே வெளியிடப்பட்டது, எனவே பீதி அடைய ஒன்றுமில்லை. ஐஓசி இன் முதன்மையான முன்னுரிமை பாதுகாப்பு. இது எஃகு குழாய்களின் பொறியியல் மற்றும் சோதனையின் ஒரு பகுதியாகும்,
மேலும் குழாய் வெடிப்பு அல்லது எரிவாயு கசிவு சம்பவம் எதுவும் இல்லை. பொதுமக்களிடையே விழிப்புணர்வை ஏற்படுத்தியதற்காகவும் தேசிய முக்கியத்துவம் வாய்ந்த திட்டத்திற்கு ஆதரவளித்ததற்காகவும் மாவட்ட நிர்வாகம், பத்திரிகை மற்றும் ஊடகங்களுக்கு ஐஓசி நன்றி தெரிவிக்கிறது.' என தெரிவிக்கப்பட்டுள்ளது.
Source : WWW.PUTHIYATHALAIMURAI.COM
from Puthiyathalaimurai - Tamil News | Latest Tamil News | Tamil News Online | Tamilnadu News